हेल्थ टिभी अनलाइन\ काठमाडौं : आजदेखि कोरोना विरुद्धको एक मात्र डोज लगाए पुग्ने जोन्सन एण्ड जोन्सन खोप लगाइने भएको छ ।

अमेरिकाले सहयोग स्वरुप दिएको जोन्सन एण्ड जोन्सन खोप काठमाडौंमा आजदेखि लगाउन थालिएको हो । अमेरिका सरकारले गत साता कोभ्याक्स सुविधा अन्तर्गत १५ लाख ३४ हजार ८५० डोज खोप दिएको थियो ।

स्वास्थ्य तथा जनसंख्या मन्त्रालयले उक्त खोपका लागि तोकिएका खोप केन्द्रमा बिहान १० देखि ४ बजेसम्म गएर लगाउन सकिने जनाएको छ । त्यसका लागि काठमाडौंमा ४४ खोप केन्द्र तोकिएको छ ।

जोन्सनको खोप लगाउनका लागि ५० देखि ५४ वर्ष उमेर समूहका पर्ने सबै नागरिक, अपांगता भएका व्यक्तिहरु, नेपालमा बसोबास गरिरहेका शरणार्थीहरु साथै यसअघि खोप लगाउन छुटेका स्वास्थ्यकर्मीलाई प्राथमिकतामा राखिएको छ ।

उक्त खोप एक डोज मात्र लगाए पुग्नेछ । खोप अभियान आजदेखि ६ गतेसम्म जारी रहने मन्त्रालयले जनाएको छ ।