हेल्थ टिभी अनलाइन \काठमाडौं : नेपाल औषधि उत्पादक संघले कोरोना उपचारमा प्रयोग हुने औषधिहरुको अभाव नरहेको जनाएको छ।

संघले शुक्रबार प्रेस विज्ञप्ति जारी गर्दै नेपालमा बजारमा हल्ला आए जस्तो नेपालमै बन्ने औषधिहरुको अभाव नरहेको स्पष्ट पारेको हो। संघले कोरोना उपचारमा धेरै प्रयोग हुने १३ वटा औषधिको सूची सहित मौज्दात विवरण सार्वजनिक गरेको छ।

कोभिड -१९ को उपचारमा अत्यधिक प्रयोग हुने औषधिको बजारमा माग धेरै भएको र आन्तरिक ढुवानी तथा कुरियरमा अवरोध भएका कारण औषधि सम्बन्धित स्थानमा पुर्‍याउन केही ढिलाई भएको संघले जनाएको छ। तर आफुहरुसँग ओषधिको मौज्दात नभएर वा उत्पादन क्षमता नभएर अभाव नभएको विज्ञप्तिमा उल्लेख छ।

यस संकटपुर्ण घडिमा हामी सम्पुर्ण उधोगीहरु देशमा कुनै पनि औषधिको अभाव हुन नदिन अहोरात्र कार्य गरिरहेको र स्वदेशमा बन्ने कुनैपनि औषधिको अभाव हुन नदिने र नहुने कुरा सबैलाई प्रतिवध्दता व्यक्त गर्दछौं विज्ञप्तिमा उल्लेख छ ।

संघले अनावश्यक रुपमा औषधि किनेर घरमा नराख्न सबैलाई आग्रह समेत गरेको छ ।