हेल्थ टिभी अनलाइन \काठमाडौं : काठमाडौं उपत्यकामा गत २४ घण्टामा १७२ जनामा कोरोना भाइरस संक्रमण पुष्टि भएको छ ।

स्वास्थ्य तथा जनसंख्या मन्त्रालयको नियमित मिडिया ब्रिफिङमा मन्त्रालयका प्रवक्ता डा जागेश्वर गौतमले आज मात्रै काठमाडौं उपत्यकामा १७२ जनामा कोरोना संक्रमण देखिएको जनाएका हुन् । डा गौतमका अनुसार काठमाडौं उपत्यकाका विभिन्न प्रयोगशालामा गरिएको परीक्षणमा काठमाडौंका १२६ जना, ललितपुरका ३८ जना भक्तपुरका ८ जनामा संक्रमण पुष्टि भएको छ ।

मन्त्रालयले संक्रमितहरुको ठेगाना भने खुलाएको छैन्। आइतबार कुल ६४१ जनामा कोरोना संक्रमण देखिंदा उपत्यकामा मात्रै १७२ जना संक्रमित भएका हुन्। यो संख्या निकै ठुलो हो ।

पछिल्लो समय काठमाडौं उपत्यकामा दैनिक रुपमा सय भन्दा बढी संक्रमित फेला पर्दै आएका छन्। लकडाउन खुलेसँगै काठमाडौं उपत्यका अति जोखिममा रहेको र ‘कोरोना हटस्पट’ बन्दै गएको भन्दै विज्ञहरुले लापरवाही नगर्न र सतर्क रहन चेतावनी दिंदै आएका छन्।