डा सुकान्तिलाई प्रश्न : के गर्भावस्थामा देखिएको मधुमेह पछिसम्म रहिरहन्छ ?
हेल्थ टिभी अनलाइन : रगतमा चिनीको मात्रा आवश्यकताभन्दा बढी भएको अवस्थालाई मधुमेह भनिन्छ । यो हाम्रो अस्वस्थकर जीवनशैली तथा खानपानसँग सम्बन्धित रोग हो । यदि यो रोग गर्भवती महिलाहरुमा देखिन्छ वा गर्भावस्थामा मधुमेह हुन्छ भने त्यसलाई जेस्टेसनल डायबेटिज अर्थात गर्भावस्थाको मधुमेह भन्ने गरिन्छ । जेस्टेसनल डायबेटिज गर्भावस्थामा मात्र देखिने मधुमेह हो ।
महिलाका लागि गर्भावस्था एक विशेष अवस्था हो । यो बेला महिलाको शरीरमा विभिन्न हर्मोनमा परिवर्तन हुन्छ जसले गर्दा शरीरमा कयौं परिवर्तन आउने गर्छन्। यही हर्मोनहरुमा आएको परिवर्तमध्ये शरीरमा ब्लड सुगरको मात्रा बढ्नु पनि हो । त्यसो त यो अवस्थामा महिलामा उच्च रक्तचाप, तनाव, मोटोपना लगायतका समस्या पनि बढी देखिने गर्छन ।
यहाँ याद गर्नुपर्ने कुरा कुनै पनि महिला यदि गर्भवती हुँदैछिन भने उनलाई गर्भावस्थामा मधुमेह हुने सम्भावना रहिरहन्छ । किनकी यो विशेष अवस्था हो । त्यसमा पनि विशेषगरी ३० वर्ष भन्दा बढी उमेरका महिला, पहिले पनि गर्भावस्थामा मधुमेह देखिएका महिला, , परिवारमा पहिले कसैलाई मधुमेह भएमा वा गर्भावस्थामा अत्यधिक वजन बढेमा पनि त्यस्ता महिलालाई गर्भावस्थामा मधुमेह हुने जोखिम अन्यको तुलनामा उच्च हुने गर्छ ।
गर्भावस्थामा मधुमेह हुने समय सामान्यतया ४ देखि ५ महिनापछि हो । त्यसैले सामान्यभन्दा फरक केही लक्षण देखिनासाथ जाँच गराउने र चिकित्सकको सल्लाह लिनुपर्ने हुन्छ । गर्भावस्थामा मधुमेह हुनु भनेको आमा र बच्चा दुबैका लागि जोखिम हो । त्यसैले यसको बेलैमा उपचार गरेर सुगर नियन्त्रणमा राख्नुपर्ने हुन्छ । स्मरण रहोस ९० प्रतिशत गर्भावस्थाको मधुमेह जेस्टेसनल डायबेटिज बच्चा जन्मेको एकदेखि डेढ महिनामा आफै हराएर जान्छ । १० प्रतिशतमा भने यो मधुमेह टाइप २ डाइबेटिजमा परिणत हुनपुग्ने तथ्यांक रहेको छ ।
अर्को कुरा जसलाई गर्भावस्थामा मधुमेह देखिएको छ उनीहरुलाई पछि गएर मधुमेह हुने सम्भावना रहिरहन्छ । त्यसैले यस्ता व्यक्तिले आफनो सुगर लेबलको जाँच समय समयमा गरिरहनुपर्छ । गर्भावस्थामा मधुमेह देखिंदैमा आत्तिन पर्दैन । स्वस्थकर खानेकुरा खाने, चिकित्सकको सल्लाह बमोजिम औषधि तथा इन्सुलिनको प्रयोग गर्ने, हल्का व्यायाम गर्ने तथा तनाव नलिने गरेमा यसको व्यवस्थापन गर्न सकिन्छ ।
(मधुमेह रोग विशेषज्ञ डा सुकान्ति शाह आरुस लाइफस्टाइल अस्पतालमा कार्यरत छिन्।)
घ्युकुमारीबाट यसरी गर्नुस् स्वास्थ्य रक्षा
आज विश्व रेडक्रस दिवस मनाइँदै
गण्डकी प्रदेशको स्वास्थ्य मन्त्रीमा सीता सुन्दास नियुक्त
मातृ तथा नवजात शिशु मृत्युदर घटाउन मिडवाइफको भूमिका महत्वपूर्ण
अत्यधिक विषादी राखिएका तरकारी र फलफूलले क्यान्सर भयावह बन्दै : विज्ञ