हेल्थ टिभी अनलाइन: कोरोना भाइरसबाट सबैभन्दा धेरै मानिस संक्रमित हुने देशहरुको सूचीमा भारत चौंथो स्थानमा उक्लिएको छ ।

भारतमा कोरोना संक्रमितको संख्या ३ लाख नाघेको छ । भारतीय स्वास्थ्य मन्त्रालयका अनुसार त्यहाँ शनिबार बिहानसम्म कोरोना संक्रमितको संख्या ३ लाख ८ हजार ९ सय ९३ पुगेको छ ।

यसैगरी भारतमा हालसम्म ८ हजार ८ सय ८४ जनाले कोरोना संक्रमणका कारण ज्यान गुमाएका छन्। गत २४ घण्टामा मात्रै ११ हजार ४ सय ५८ संक्रमित थपिएका छन्। भारतमा एकैदिन देखिएको संक्रमितको यो संख्या अहिलेसम्मकै धेैरै भएको त्यहाँको मन्त्रालयले जनाएको छ ।  कोरोना भाइरसका कारण पछिल्लो २४ घन्टामा ३८६ जनाले ज्यान गुमाएका छन् । अहिलेसम्म कोरोना उपचार गरी निको भएर घर फर्किनेको संख्या १ लाख ५४ हजार भन्दा बढी रहेको छ ।

भारत कोरोनाको सबैभन्दा बढी प्रभावित हुने देशहरुमा चौथों नंम्बरमा रहेको छ । अमेरिका, ब्राजिल, रुस पछि भारतमा धेरै संक्रमित देखिएका छन्। भारतमा लगातार ९ दिनदेखि १० हजारका दरले दैनिक रुपमा संक्रमित बढिरहेका छन्।

हेल्थ टिभी अनलाइन\ काठमाडौं: गण्डकी प्रदेशमा थप ५ जनामा कोरोना संक्रमण देखिएको छ । शनिबार बिहान पर्वतका ४ र नवलपुरका १ जनामा कोरोना संक्रमण पुष्टि भएको प्रदेश स्वास्थ्य निर्देशनालयले जनाएको । योसँगै गण्डकी प्रदेशमा कोरोना संक्रमितको संख्या १९७ पुगेको छ ।

पर्वतको कुश्मा नगरपालिका स्थायी ठेगाना भई सोही पालिकाको क्वारेन्टाइनमा रहेका ६ वर्षीय बालक, १७ वर्षीय किशोरीमा कोरोना संक्रमणको पुष्टि भएको छ । यसैगरी पर्वतकै जलजला गाउँपालिका स्थायी ठेगाना भई कुश्मा नगरपालिकाको क्वारेन्टाइनमा रहेका १७ का १ जना युवक र महाशिला गाउँपालिका स्थायी ठेगाना भई कुश्मा नगरपालिकाको क्वारेन्टाइनमा रहेका १६ वर्षीय अर्का युवकमा समेत कोरोनाको संक्रमण देखिएको छ ।

साथै गण्डकी प्रदेश, नवलपरासी जिल्ला बर्दघाट सुस्ता पूर्व मध्यबिन्दु नगरपालिका स्थायी ठेगाना भई सोही पालिकाको क्वारेन्टाइनमा रहेका ४५ वर्षे पुरुषमा कोरोना संक्रमणको पुष्टि भएको छ। उनीहरुलाई जिल्ला स्थित आइसोलेसन सेन्टरमा लैजाने तयारी भइरहेको निर्देशनालयले जनाएको छ ।